Një alarm i rremë për bombë ka detyruar një avion që fluturonte nga Egjipti në Gjermani, të bënte një ulje të detyruar në Kretë. Ky rast ka ndodhur një ditë më parë.
Alarmi u dha kur në tualetin e avionit është gjetur një letër që shkruante “bombë”. Boeing 757 e Condor Airlines po fluturonte nga aeroporti i Egjiptit në Hurghada në Dusseldorf të Gjermanisë, me 281 pasagjerë në bord, kur u ulë në Kretë.
Kur avioni ka hyrë në zonën ajrore të Greqisë, është shoqëruar nga dy avionë luftarakë “F16”, derisa ka kryer uljen e detyruar. Pas kontrollit të kryer nga forcat speciale të policisë, me ndihmën edhe të qenve të trajnuar posaçërisht për zbulimin e eksplozivëve, rezultoi se alarmi ishte fals, pasi nuk u gjet asnjë pajisje shpërthyese, ndërkohë që pasagjerët kanë kaluar natën në aeroport dhe do të vijojnë udhëtimin këtë të premte.
