Gara për kreun e FSHF-së sa më shumë i afrohet 7 shkurtit më e nxehtë bëhet. Pas akuzave që ngriti kandidati Bashkim Fino mesditën e sotme, ku kërkonte publikimin e listës së anëtarëve të Asamblesë të cilët do të marrin pjesë në votim, ka ardhur dhe përgjigjja nga ana e Federatës.
Është sekretari i përgjithshëm, Ilir Shulku, që i përgjigjet kërkesës së Finos menjëherë, duke i sqaruar se nuk ka asnjë detyrim ligjor për ta bërë listën publike. Report Tv ka siguruar përgjigjen që ka ardhur nga FSHF për të bërë transparente listën e anëtarëve që kanë të drejtë e votës.
“Nuk e kemi detyrim ligjor një gjë të tillë, për çdo gjë tjetër mbahemi në kontakt.”, është përgjigjja. Menjëherë më pas, Fino ka hedhur akuza se gara ka mungesë transparence dhe pastërtie.
