Pas akuzave nga eksponentë të PD-së, ministri i Brendshëm Fatmir Xhafaj është përgjigjur sot gjatë fjalës së tij në parlament.
Xhafaj tha se gjatë 8 viteve të qeverisjes së PD-së, ata kishin mundësi ta “kryqëzonin” atë me fakte, por askush nuk gërmoi ndërsa shtoi se ai nuk ka asnjë përgjegjësi për këtë histori.
“Keni ndërmarrë ndaj meje një sulm në një histori të filluar 15 vite më parë dhe unë u përgjigja. Në 2010 kur ju ishit në pushtet më sulmuat me të njëjtin avaz për vëllain.
Unë iu përgjigja sërish akuzave, çfarë kam pasur i kam thënë të gjitha. Ju prej tetë vitesh ishit në pushtet si kryeministër dhe ministër i Brendshëm i kishit mundësitë, nuk besoj se i falët familjarët e mi.
Edhe vjet iu rikthyet me avazin. E rifilluat sërish sivjet në mars kur u bëra ministër, nga maji i këtij viti ishit në qeveri te Drejtësia dhe e Brendshmja dhe janë dy ministri ku janë faktet dhe provat nëse ka të tilla. Por si nuk gërmuat? Ku kishte rast më të mirë sesa të më kryqëzonit.
Jo vetëm kryetari juaj, por askush tjetër nuk mund të më vendosë në këtë akuzë për atë që mund t’i ndodhë një pjesëtari të familjes time.
Kujtdo që mund ti ndodhë është në moshë madhore dhe mund të përgjigjet. Por edhe nëse do të ishte e vërtetë, unë kam të drejtën të pyes?
Ku është përgjegjësia ime? Sa për ligjore as që bëhet fjalë. Unë jam i gatshëm të përballem me përgjegjësitë e mia. Nuk kam ndërmend të merrem me replika” deklaroi ai.
