Sot në Tiranë është organizuar aktiviteti me temë “Të studiosh në Turqi”. Fondacioni “ALSAR” dhe Universiteti “18 Mars” i qytetit Çanakkale në Turqi kanë vendosur në fokus të zhvillimit të marrëdhënieve të bashkëpunimit në fushën e arsimit dhe kulturës, prezantimin e sistemit arsimor dhe mundësitë që ofrohen për studentët e huaj në Turqi.
Pjesë e kërij aktiviteti kanë qenë përfaqësues të pushtetit lokal në Tiranë, përfaqësues të ambasadës së Turqisë në Shqipëri, drejtuesit e Fondacioni “ALSAR”, të Universitetit “18 Mars” , studiues, studentë.
Mes të tjerash Kryetari i Fondacionit “ALSAR”, Mehdi Gurra tha se ky aktivitet organizohet për tju ardhur në ndihmë të gjithë të interesuarve që dëshirojnë të studiojnë në Turqi duke ju prezantuar mënyrën e funksionimit të sistemit arsimor në Turqi.
“Miqësia mes dy vendeve është në nivele shumë të larta dhe uroj që këto marrëdhënie të forcohen. Para një viti Turqisë i ndodhi një dramë e madhe. Dështimi i grushtit të shtetit dhe përkrahja që populli turk i dha sistemit të drejtimit aktual na gëzoi patjetër. Mendoj se është vendi për t’i përkujtuar dëshmorët e mbrojtjes së demokracisë”, tha Gurra.
Duke thënë se problemi i arsimimit të shqiptarëve në Turqi është nga shtrirja jo gjithëpërfshirëse në qytetet e Shqipërisë, por edhe nga mos njohja e mënyrës se si mund të aplikojnë për të shkuar në Turqi, Gurra tha “Organizuam këtë takim për të prezantuar mënyrën se si një qytetar shqiptar mund të aplikojë për të studiuar në Turqi. Uroj që studentët të jenë ura lidhëse mes dy vendeve.”
Në këtë takim ku ka qenë prezente zëvendës ambasadore e Turqisë në Tiranë, Gül Sarıgül, u shpreh se marrëdhëniet turko-shqiptare janë në një nivel shumë të mirë në shumë fusha.
“Ne si Turqi po mundohemi që të mbrojmë dhe çojmë më tej lidhjet historike që i kemi që prej qindra vitesh. Pjesa e marrëdhënieve arsimore dhe kulturore është një pjesë shumë e rëndësishme, sepse këto dy aspekte fuqizojnë më shumë bashkëpunimin, duke krijuar një lloj themeli për marrëdhëniet tona në fusha të ndryshme. Sistemi i arsimit të lartë në Turqi ofron disa mundësi dhe avantazhe më të mira se në disa shtete të Evropës”, theksoi Gül Sarıgül.
Ndërkohë që zv.rektori i Universitetit “18 Mars” në Çanakkale, Prof.Dr. Süha Özden, prezantoi sistemin arsimor në Turqi, mundësitë që kanë studentët e huaj për studime në universitetin që ai përfaqëson, por edhe në universitete të tjera në Turqi.
