70 persona u arrestuan dhe 19 të tjerë u shpallën në kërkim pasi ishin të implikuar në shpërndarjen e drogës në kryeqytet. Në finalizim të operacionit “Tempulli 2” policia u përqendrua në zonat problematike si Alliasi, Kafja e Rremës, Selita, Kinostudioja dhe në zonën e ish-Bllokut në klube dhe bare.
“Shpërndarësit e lëndëve narkotike i kishin sofistikuar mënyrat e mbrojtjes nga policia. Shisnin vetëm brenda banesës kishin kamera në dyer e pallate. Një pjesë e tyre punonin 4-5 veta bashkë dhe kishin një furnizues, kishte raste që punonin si familje, siç ishte rasti në Selitë apo individualisht”, shefi i sektorit kundër Narkotikëve në Policinë e Tiranës, Arbër Zemani.
Gjatë këtij operacioni Policia e Tiranës sekuestroi 5.3 kg kokainë, 14 kilogram kanabis doza të shumta heroine si edhe sasi të konsiderueshme parash të përfituara nga ky aktivitet kriminal.
