Maqedonia e Veriut do të mbajë dy ditë zie, pas aksidentit tragjik që u mori jetën 14 personave.
Është kryeministri i Maqedonisë, Zoran Zaev ai që ka njoftuar se Qeveria e Republikës së Maqedonisë së Veriut, në seancën e jashtëzakonshme, vendosi të shpallë ditë zie 14 dhe 15 shkurtin për shkak të tragjedisë së madhe që ndodhi dje pasdite në rrugën Shkup-Tetovë.
“Dhimbja dhe pikëllimi nuk mundë të maten dhe nuk ka fjalë që mund të ngushëllojë aksidentin e rëndë që ishte fatale për shumë nga bashkëqytetarët tanë. Ngushëllime deri tek me të dashurit e tyre. Po mobilizojmë të gjitha forcat dhe kapacitetet për të ndihmuar të gjithë të tjerët që janë në rrezik për jetën në mënyrë që sa më shpejtë të kthehen tek të dashurit e tyre”, ka shkruar kryeministri Zaev.
Ndërkohë, rreth 30 të lënduar ndodhen në Klinikat e Shkupit, ku ekipe të shumta mjekësore janë të angazhuar në mjekimin dhe operimin e tyre. Mësohet se 4 prej të lënduarve janë në gjendje kritike për jetën.
Aksidenti ka ndodhur në autostradën Shkup-Tetovë, në kilometrin e shtatë të saj.
