Detaje të reja e bëjnë edhe më të mistershme ngjarjen në Maminas, ku humbi jetën një 23-vjeçare dhe një taksist, pas përplasjes së automjetit ku ata udhëtonin nga një tjetër mjet tip Benz.
Pas ngjarjes së rëndë, në çantën e Elena Avdillarit është gjetur një biletë udhëtimi me traget për në Bari.
Por, duket se diçka ka bërë që vajza të ndërrojë ‘mendje’ dhe të mos niset për në Itali, teksa nga porti i Durrësit ka marrë një taksi për të udhëtuar më pas drejt Tiranës.
Gjatë rrugës, fatkeqësisht ajo së bashku me drejtuesin e mjetit, 60-vjeçarin Bujar Agalliu humbën jetën nga përplasja tragjike nga një Benz.
Burime nga Policia Kufitare thanë se Avdillari nuk është paraqitur në sportelin e portit për të vulosur dokumentet, ndërsa asaj nuk i ishte refuzuar udhëtimi drejt Italisë.
Siç duket edhe në fotot e publikuara nga BalkanWeb, pas aksidentit në rrugë kanë mbetur këpucë të kuqe, atlete të bardha që vajza kishte veshur, një rimel, stilolaps dhe një fletore.
