Një aksident automobilistik është regjistruar mbrëmjen e sotme në aksin Tepelenë-Mallakastër pranë fshatit Krahës.
Mësohet se pesë persona jane lenduar rëndë, mes të cilëve dhe një fëmijë 9-vjeçar. Automjeti tip ”Toyota” me targa greke, po shkonte në drejtimin verior drejt Tiranës, ndërkohë që i është prerë rruga nga një kamionçinë që vinte nga një rrugë sekondare e fshatit.
Për rrjedhojë, përplasja ka qenë e fortë pasi kamionçina, sipas informacioneve nga grupi hetimor që ka mbërritur në vendngjarje, ka hyrë në rrugën kryesore pa sinjal. Ky veprim shkaktoi lëndimin e të gjithë personave që gjendeshin në bordin e autoveturës që vinte nga Greqia.
Në autoveturë udhetonte çifti i bashkeshortëve nga Fieri së bashku me fëmijen e tyre, si dhe gjyshi dhe tezja e femijes. Të pestë të lënduarit janë shtruar me urgjencë në Spitalin Rajonal të Gjirokastrës, ndërkohë që bashkeshortja e drejtuesit të mjetit është shtruar në reanimacion me plagë të rënda.
