Ministri i Financave dhe Ekonomisë, Arben Ahmetaj ka thënë se në qytete të caktuara do të lejohen kazinotë. Këtë deklaratë ai e bëri mbrëmë në emisionin “Open”, ku tha se mund të caktohet që në zona turistike, të tilla si Vlora e Saranda të jepet licencë për hotele me 5 yje, ku do të ketë edhe kazino.
“Logjika është me zona të përcaktuar me VKM, jo çdo kush mund të vejë në çdo vend. Për sa i përket resort-kazinove, për shembull me VKM mund të caktohet që zona Vlorë-Sarandë do të ketë 2 kazino, e do të hapet garë se kush hotel me 5 yje do ta marrë këtë licencë, e si do ta marrë këtë licencë. Në logjikën e turizmit dhe investimeve të hoteleve me 5 yje u është krijuar mundësia për të pasur një licencë kazinoje. Cili është risku i çarjes së kësaj dige, që çdo lloj hoteli mund t’i vinte 5 yje dhe të kërkonte licencën për kazino. Këtë e kemi të zgjidhur, sepse kërkojmë “brand names”, pra emra të regjistruar dhe certifikuar ndërkombëtarisht,” tha Ahmetaj.
Dje mazhoranca miratoi në Kuvend ligjin për lojërat e fatit me 75 vota pro.
