Grumbullimi i tij ishte një lajm i gëzueshëm për tifozët kuqezi, por kurrsesi askush nuk e kishte menduar që pas dy konferencave krah Panuccit si kapiten dhe më pas nuk aktivizohet për asnjë minutë. Përpos kësaj Ansi Agolli është kapiteni i kombëtares dhe që ka dhënë një kontribut të jashtëzakonshëm për kombëtaren, e eksperienca mund ta ndihmonte shumë grupin pavarësisht moshës. Ansi ka analizuar dy ndeshjet e kombëtares dhe duket qartë zhgënjimi i tij që nuk u aktivizua nga trajneri.
Ansi, një humbje zhgënjyese ndaj një Skocie që na dominoi totalisht?
Nuk di çfarë të them, më shumë e dhuruam vetë këtë humbje.
A është e ndershme që ju u rikthyet në Kombëtare dhe nuk luajtët qoftë edhe një minutë ndaj Izraelit apo Skocisë, ndërkohë që përpara ndeshjeve keni dalë edhe në krah të trajnerit në konferencat për shtyp…?
(pfff mendohet). Tani çfarë të bëj, duhet të tregohemi profesionistë. Çfarë kisha për të bërë, e kam bërë. Stërvitjen e kam kryer në maksimumin tim, por pastaj ato janë punët e trajnerit, zgjedhjet që bën ai për formacionin. Më erdhi mirë që u riktheva, sepse në fund të fundit jam në Kombëtaren time. Gjithsecili kur vjen në Kombëtare ka shumë dëshirë të aktivizohet. Edhe unë normalisht doja të luaja, besoj se nuk është diçka gabim.
Shiriti i kapitenit po kalon dorë më dorë thuajse çdo ndeshje. Mos ndoshta po zhvlerësohet roli i kapitenit në Kombëtare?
Trajneri ka thënë diçka për këtë çështje para se të fillonin eliminatoret, kështu që është e kotë tani ta komentoj.
Ndaj Izraelit fituam, por formacioni më pas ndryshoi jo pak. Ju duket e habitshme?
Ndoshta kjo ndikoi në ekip, por këto ndryshime kanë kohë që kanë filluar në Kombëtare. Pra, nuk është diçka që ka ndodhur vetëm në dy ndeshjet e fundit
