Radja Nainggolan nuk u grumbullua nga trajneri i Belgjikës, Roberto Martinez për në finalet e Botërorit 2018 që do të organizohet në Rusi duke filluar nga 14 qershori. Por nuk është vetëm kjo surpriza në listën e belgëve, pasi vihet re që pas shumë vitesh pritje ka ardhur edhe momenti i Adnan Januzajt.
Januzaj ka bërë shumë bujë në media për refuzimin që i kishte bërë Shqipërisë dhe Kosovës për tiu bashkuar, por në fund duket se arriti atë që dëshiroi, të luaj në një kompeticion të madh me përfaqësuesen belge. Aktualisht ai aktivizohet tek Real Sociedat, në La Ligan Spanjolle ku luan rregullisht dhe ka zhvilluar një sezon pozitiv.
Për këtë vendim trajneri ka deklaruar: “Nainggolan është një lojtar i fortë. Por vendimi është për arsye taktike. Në dy vitet e fundit ekipi ka punuar në një mënyrë specifike dhe janë lojtarë të tjerë që i kanë ato role. Ne e dimë potencialin që ka Januzaj. Ai është një lojtar që mund të ndihmojë shumë ekipin në mënyrën se si ne duam ta ndërtojmë lojën tonë.”
I menjëhershëm ka qenë reagimi i mesfushorit të Romës, i cili me anë të rrjeteve sociale përveçse thumboi trajnerin ka surprizuar me vendimin për t’u tërhequr nga kombëtarja.
“Me shumë dhimbje në zemër unë i dhashë fund karrierës ndërkombëtare… Gjithmonë kam bërë gjithçka për të qenë atje dhe përfaqësoj Belgjikën… për fat të keq vërtet që nuk jam i mirë për disa … Dhe nga sot unë do të jem një tifozë më shumë”, shkruan Nainggolan në Instagram.
