Zëvendëskryeministrja Ledina Mandija, në vijim të deklaratave të këtyre ditëve për përfshirjen ose jo të administratës publike në aktivitete partiake, sqaron se nëpunësi civil jashtë orarit zyrtar ka të drejtë të marrë pjesë në veprimtari politike, por nuk i lejohet të shprehë publikisht bindjet dhe preferencat e tij politike.
Në një deklaratë për mediat, numri dy i qeverisë, detajon vendimin, sipas të cilit, vetëm prania fizike në heshtje në fushatë, nuk përbën shkelje. ”Nëpunësit civil nuk i lejohet të ndërmarrë veprime, të bëjë fushatë për një subjekt politik/zgjedhor apo kandidat, të jetë protagonist në aktivitete/veprimtari politike apo të manifestojë me pankarta, parulla apo çdo mjet tjetër të shkruar dhe të ekspozuar publikisht”.
Gjithashtu, sqarohet që gjatë orarit zyrtar të punës çdo lloj pjesëmarrjeje në veprimtari politike apo fushatë zgjedhore për një parti politike ose kandidat është e ndaluar për çdo punonjës të administratës shtetërore nëpunës civil, administrativ apo me kontratë punë.
“Çdo pjesëmarrje në kundërshtim me këto rregulla sjell përgjegjësi penale, sipas ndryshimeve më të fundit të miratuara në Kodin Penal nga Kuvendi i Shqipërisë”, thuhet në deklaratën sqaruese të zv/Kryeministres Mandia.
Ky ka qenë edhe qëndrimi i kryeministrit Rama i deklaruar ditë më parë dhe i drejtores së DAP, Albana Koçiu, i deklaruar dje.
