Pas thirrjes së Edmond Haxhinastos, Prokuroria e Krimeve të Rënda ka thirrur një tjetër ish-ministër për t’u pyetur në lidhje me skandalin e rrugëve.
Bëhet fjalë për Sokol Dervishajn, ministër i Transporteve në periudhën që zhvillohej projekti.
Ashtu siç u paralajmërua mbrëmë nga gazetarja Klodjana Lala, mësohet se Dervishaj do të paraqitet në orën 13:00 në Prokurori, për të dëshmuar në lidhje me skandalin e rrugës Tiranë-Elbasan, ku sipas hetimeve, ka pasur një dëm prej 37 milionë dollarësh me zbatimin e projektit.
Kujtojmë se dje Haxhinasto qëndroi përreth 2 orë në Prokurorinë e Krimeve të Rënda, ku dha dëshminë e tij lidhur me abuzimet e fondit për rrugën në fjalë, ndërsa tha për mediet:
“Fola për ato gjëra që kanë të bëjnë me përgjegjësitë e mia si ish drejtues i ministrisë së Transporteve dhe Infrastrukturës gjatë një periudhe, e theksoj, të zhvillimit të këtij tenderi.”
