Ish-ministri i Transportit Edmond Haxhinasto është paraqitur sot në Prokurorinë e Krimeve të Rënda, ku do të merret në pyetje për çështjen e korrupsionit me rrugën Tiranë-Elbasan.
Kjo e fundit çoi në pranga dy ish-drejtorë të lartë, Dashamir Xhikën dhe Andi Tomën, të cilët akuzohen për abuzime lidhur me rrugën Tiranë-Elbasan dhe rrugën e Gjinarit. Haxhinasto pritet të pyetet lidhur me hetimet në fjalë.
Marrja në pyetje e Haxhinastos vjen pas arrestimit të ish-zyrtarëve të lartë të ARRSH-së.
Pak ditë pas arrestimeve, u mësua se po verifikohej edhe vetë Haxhinasto, i cili ka deklaruar për mediat:
S’më shqetësojnë fare as hetimet, as verifikimet. Unë kam bërë drejtimin politik të ministrisë. Gjithkush është i lirë të verifikojë. Gjithë veprimtaria ime është bërë mbi bazën e dokumenteve që janë atje. Të verifikohen, unë jam i gatshëm.
Por gjithashtu duhet t’ju them se koha e drejtësisë popullore kur ngriheshin thashethemnaja dhe njerëzit goditeshin qoftë moralisht, qoftë fizikisht ka përfunduar bashkë me sistemin e kaluar.
Unë jam këtu, do jem këtu. Nëse kjo do të degjenerojë në goditje politike, unë do t’i përgjigjem politikisht shumë rreptë.
