Pas apelit të kreut të PDIU-së, Shpëtim Idrizi, drejtuar presidentit të vendit, Bujar Nishani, që të mbledhë aktorët politikë në vend në mënyrë që të gjendet një zgjidhje e krizës politike, pasi në të kundërt rrezikohet siguria kombëtare, kreu i shtetit ka thirrur në zyrën e tij, shefin e Shërbimit Informativ Shtetëror, Visho Ajazi.
Kreu i Shërbimit Informativ Shtetëror është parë të hyjë në Presidencë, rreth orës 13:00. Mësohet se Ajazi është thirrur nga kreu i shtetit Nishani, lidhur me zhvillimet e fundit politike, të cilat kanë hyrë në një rrugë pa krye, kur as faktori ndërkombëtar nuk po arrin t’i sjellë palët në një mendje.
Ndërsa më herët, kreu i PDIU-së paralajmëroi presidentin Nishani se mund të kemi cenim të sigurisë kombëtare, përderisa kriza politike nuk po merr asnjë zgjidhje.
Në këtë rast, i takon presidentit të vendit që të ndërhyjë për të ulur aktorët politikë në një tryezë të përbashkët ose në të kundërt do të jetë i detyruar të mbledhë Këshillin e Sigurisë Kombëtare, në rast të trazirave të mundshme midis dy forcave kryesore politike, kur opozita ka paralajmëruar një protestë të madhe më 7 maj, në qytetin e Kavajës.
Për të mbledhur informacion mbi mundësitë ose jo të përplasjeve politike, Nishani ka thirrur në zyrë kreun e SHISH, Visho Ajazin, dhe për të vendosur më pas në bazë të këtij informacioni, nëse do thërrasë në një tryezë të përbashkët partitë politike apo Këshillin e Sigurisë Kombëtare.
Tirana Today
