Flori Mumajesi, më në fund, thyen heshtjen dhe flet për dashurinë e vërtetë. Këngëtari ka arritur ta mbajë shumë disketë jetën e tij private. Fansat e tij kanë qenë kureshtarë gjatë gjithë kohës. Ndërsa mediat kanë aluduar për histori të ndryshme dashurie mes tij dhe vajzave të njohura të ekranit.
Madje, pas ndarjes së tij profesionale me këngëtaren e njohur Elvana Gjata, zërat u shtuan edhe më shumë. Më këngëtaren ai pati një bashkëpunim të gjatë muzikor. Një pjesë e teksteve të këngëve të tij të fundit janë komentuar mjaft në rrjet. Madje shumë kanë guxuar dhe kanë hamendësuar se këto dedikime të koduara, Flori i ka adresuar tek Elvana.
Në fakt, nuk është aspak kështu. Edhe pse nuk ka dashur asnjëherë të flasë ndryshe veçse me muzikë, Flori, ka thyer heshtjen. Në ” Kënga Magjike”, ai ka preferuar t’i përgjigjet pyetjes që i ka munduar të gjithë.
Ai do të marrë pjesë në në edicionin e 20-të të Këngës Magjike, “Plas”. Arditi i bëri me dije Florit se do t’i nënshtrohej një interviste të pazakontë: ai do të ishte vetë gazetari që do t’i ndërtonte pyetjet dhe po ai që do t’u kthente atyre përgjigje.
Meqë “u detyrua” të bënte edhe gazetarin, Flori zgjodhi t’i bënte vetes disa pyetje që ia kanë bërë shpesh edhe fansat: “Flor, a ke rënë ndonjëherë në dashuri vërtet?” ishte pyetja e “gazetarit” dhe menjëherë iu kërkua nga Arditi të ulej në vendin e tij dhe t’i përgjigjej:
“Ta them një herë e mirë. Përgjigjja imë është PO. Kam rënë në dashuri një herë vërtet dhe besoj që njeriu një herë dashuron në jetë”, – tha ai.
Kjo deklaratë u shoqërua me duartrokitje nga publiku, por jo nga një grup vajzash, të cilat nuk reaguan njëlloj pasi mësuan këtë të thënë nga goja e vetë Florit.
Pasi Arditi ia vuri në dukje se ato vajzat atje sipër…., Flori tha me humor: “E kisha për familjen unë, mos u shqetësoni ju, rrini të qeta”.
Por pas kësaj u bë edhe një herë tjetër serioz: “Realisht, dua ta bëj me dije një herë e përgjithmonë. Mbajeni mend! Po, kam dashuruar dhe nuk ka të bëjë fare, fare, po fare me showbiz-in në përgjithësi. Jeta ime nuk ka filluar as dje, as pardje dhe nuk mbaron sot. Kaq”, – tha Flori dhe e mbylli.
“Hajde gjeje tani….” – tha Arditi pas kësaj deklarate me kode të tjera.
