A keni provuar ndonjëherë të mos mendoni asgjë? Nëse përpiqeni, do të shkaktoni saktësisht efektin e kundërt, ndërsa truri vazhdon të mendojë…
Është vërtetuar se truri nuk pushon asnjëherë, madje edhe atëherë kur mendja lihet krejtësisht e lirë, çka do të thotë të ishte njëlloj sikur të mos kishte fare aktivitet mendor. Por të mendosh, nuk do të thotë vetëm të reflektosh dhe të kujtosh, në mënyrë të vetëdijshme dhe të qëllimshme, por edhe të imagjinosh, fantazosh dhe shëtisësh mendjen nëpër shoqërizime të lira.
Zbrazja e mendjes nga gjithçka, është diçka e pamundur, për shkak se truri ynë nuk pushon kurrë: në mesin e viteve 1990, në Universitetin e Mjekësisë në Sent Ljius (SHBA), u zbulua një qark i rajoneve të trurit i quajtur ”default mode network”, që aktivizohet, pikërisht, kur nuk bëhet asnjë përpjekje konjitive dhe mendja lihet të endet e lirë.
Aty konsumohet rreth 20 herë më shumë energji cerebrale nga ajo që përdoret për një reagim të thjeshtë ndaj një stimuli të jashtëm, si p.sh. përzënia nga trupi e një mushkonje, madje u spekulua se mund të jetë selia e ndërgjegjes.
Qetësohuni
Pastaj kur sforcoheni të mos mendoni asgjë, merrni pikërisht efektin e kundërt. Kjo është dëshmuar nga Daniel Vagner, psikolog në Universitetin e Harvardit: nëse u kërkonte subjekteve të hulumtimit të tij të mos mendonin për diçka, për shembull mbi një film që sapo kishin parë, ata përfundonin duke menduar më shpesh në lidhje me të.
Megjithatë, ata që praktikojnë meditimin, arrijnë të fitojnë një qëndrim më të qetë dhe të shkëputur ndaj mendimeve vetjake, apo arrijnë të ndërpresin rrjedhën e tyre, duke e përqendruar vëmendjen vetëm tek argumentet e veçanta.
Përshtati për Tirana Today, Alket Goce
“Focus.it”
