Të hënën pritet që opozita të bllokojë disa akse rrugore për të protestuar, ndërsa Basha ritheksoi sot se nuk do të ketë asnjë skenar të ngjashëm me atë të 1997-ës.
Por, pas këtij qëndrimi, Partia Socialiste është kundërpërgjigjur, duke i kujtuar Bashës se nuk mund të hiqet si qengj i butë, teksa deklaron se nuk do e lejojë PD-në të marrë peng të ardhmen e shqiptarëve. Gjithashtu, PS jep alarmin mbi protestën e së hënës, e cila sipas saj, “çon pashmangshmërisht drejt dhunës, si në 1997-ën”.
Më poshtë deklarata e PS-së:
Është koha që Basha të mësojë se: Ai që bënte thirrje vetëm pak ditë më parë për të thyer dritaret e për të shpuar gomat, nuk mund të pretendojë krejt papritur e pakujtuar se është thjesht një qingj i pafajshëm.
Çadra e Bashës e ka vonuar mjaft tashmë zbatimin e Reformës në Drejtësi dhe rrezikon ta nxjerrë Shqipërinë nga rruga drejt BE-së.
Kërcënimet e tij për bllokimin e rrugëve dhe bojkotin e zgjedhjeve janë një rrugë e rrezikshme, që na çon pashmangshmërisht, vetëm drejt dhunës, pikërisht ashtu si në 1997-n.
Ne nuk do ta lejojmë PD-në t’iu marrë peng të ardhmen shqiptarëve. Në 18 Qershor, qytetarët do të jenë të lirë të shprehin vullnetin për zgjedhjen e tyre.
