Kryetari i Grupit Parlamentar të Partisë Demokratike, Gazment Bardhi, ka bërë një deklaratë konfuze lidhur me zhvillimet e fundit brenda Partisë Demokratike. Ai ka theksuar se mban të njëjtin qëndrim si dy vite më parë lidhur me ish-kryeministrin Sali Berisha. Pavarësisht që ditën e djeshme u ulën në tryezën e pajtimit për të diskutuar lidhur me mënyrat që do të ndjekin për të bashkuar opozitën dhe për ta bërë atë funksionale kundër qeverisjes së kryeministrit Rama, Bardhi tha se ai do të vijojë të qëndrojë krah partnerëve strategjikë.
Ndërsa më pas deputeti demokrat tha se mes Berishës dhe Ramës ai zgjedh ish-kryeministrin, ndërsa mes tij dhe një lidershipi të ri, ai zgjedh këtë të fundit.
“Nuk kam asnjë ndryshim qëndirmi me atë çështje e kam thënë edhe më parë mes SHBA Britanisë dhe BE, unë do të qëndroj krah SHBA, Britanisë dhe BE. Mes Sali Berishën dhe Edi Ramës zgjedh Berishën, mes Berishën dhe lidershipin e ri zgjredh lidershipin”, tha Bardhi.
Sa i përket deklaratave të bëra ditën e djeshme të kryetarit të Partisë Demokratike, Lulzim Basha i cili komentoi mbledhjen e mbajtur mes deputetëve të opozitës duke thënë se të gjithë ata ligjvënës të cilët iu bashkuan “bunkerit antiamerikan udha e mbarë i qoftë”, Bardhi tha se Basha bën shumë gabim që flet si zëdhënësi i ndërkombëtarëve.
“Nuk e marr seriozisht. Unë kam mendimin se Basha bën shumë gabim që flet si zëdhënësi i partnerëve ndërkombëtarë. Në fakt është duke i shërbyer një tezë të rrezikshme që është përhapur studio më studio sikur vendimarrjet e partnerëve strategjikë kanë qenë një ndërhyrje e Edi Ramës për të shkrirë opozitën. Qarkkullon kjo tezë në dy vite, një tezë që nuk përputhet me realitetin. Mbajtja ndezur e konfliktit, si Basha po tenton të bëjë, po dëmton opozitën dhe po çon drejt shuarjes. Ndërkohë qëllimi i partnereve strategjikë ka qenë forcimi i opozitës.
Çdo veprim politik në gjykimin tim që çon ujë te teza që ndërkombëtarët janë bërë me Ramën sepse duan të mbajnë në pushtet Ramën vetëm rrit frymën antiamerikane. Kësaj teze unë nuk i shërbej dot, Basha nuk e di nëse i shërben me vetëdije apo jo, por dua të them që mesazhi që unë kam marrë në çdo takim ka qenë që Shqipëria duhet të ketë një opozitë të fortë. Opozita mos haet mes vetes por të bëjë opozitë përballë Edi Ramës. Dhe ky ështëi nteresi i SHBA. Britanisë dhe BE”, tha Bardhi.
