Euro ka rënë në një tjetër minimum historik këtë të enjte. Sipas kursit zyrtar të Bankës së Shqipërisë 1 Euro u këmbye me 112.04 Lekë. Në një javë monedha europiane ka humbur 1.07 pikë.
“Jemi në prag të zgjedhjeve lokale dhe ka më shumë para në qarkullim, këtë rast jo në monedhën vendase mesa duket janë në Euro. Nga ana tjetër kemi pasur një shtrëngim të politikës monetare”, tha Majlind Lazimi, ekspert i ekonomisë.
Një Lek më i çmuar seç duhet sipas ekspertëve ka sjellë disa disbalanca në ekonomi.
“ky moment historik i mbiçmimit të lekut padyshim që në këndvështrim aftashkurtër dhe aftamesëm mund të mos jetë i shëndetshëm për ekonominë shqiptare. Kemi eksportuesit që janë goditur shumë. Ato që përfitojnë qartë janë importuesit.”
Ndërsa jemi në prag të sezonit turistik, pritshmëritë janë që Euro të qëndrojë e zhvlerësuar për një periudhë gjashtë mujore.
“Ndoshta nga vjeshta mund të kemi rikuperim të euros në nivelin 113, 114 Lek”, u shpreh Lazimi.
Monedha kombëtare ka fituar terren edhe ndaj valutave të tjera. Dollari amerikan sot këmbehet me 102.20 lekë, Paundi me 127.00 lek ndërsa Franga Zvicerane 114.11 lek.