Në prani të pedagogëve, studentëve, muzikantëve, artistëve të njohur, drejtues të shoqatave të ndryshme që lëvrojnë artin muzikor, ish-studentëve të Fakultetit të Muzikës, është përuruar ditën e enjte, më 31 mars, “Historia e muzikës shqiptare” i kompozitorit dhe Prof. As. Nestor Kraja.
Ky aktivitet erdhi në një kohë kur Fakulteti i Muzikës është duke mbajtur një sërë aktivitetesh.
Në ceremoninë e organizuar në sallën “Ibrahim Madhi” në Universitetin e Arteve morën fjalën dhe nderuan punën e autorit emra të njohur të këtij Fakulteti si: pedagogu dhe violinisti Lorenc Radovani, kompozitori dhe pedagogu Aulon Naçi të cilët u përqëndruan në analizën e kësaj pune disa vjeçare.
Dekan i Fakultetit të Muzikës në Universitetin e Arteve Prof. Dr. Isak Shehu, në fjalën e tij përshëndeti autorin dhe tregoi edhe njëherë mbështetjen që botimet e kësaj natyre të vijojnë dhe të jenë kontribuese për studentët dhe më gjerë.
Në fjalën e tij, autori Kraja shprehu falenderimin për të pranishmit dhe tha se ky botim erdhi pas një kohe pandemie, kur po flitet për luftë dhe për një aktualitet të vështirë ekonomiko-politik, e shoqëror si një gur në zhvillimet muzikore të vendit që me siguri do bëhet më i madh e do të pasohet nga kontribues të tjerë.
“Historia e muzikës shqiptare” është kontribut i punës disa vjeçare të Prof. As. Nestor Kraja. Ky botim i mbështetur nga Fakulteti i Muzikës i Universitetit të Arteve në Tiranë, pasqyron trajektoren e zhvillimeve muzikore shqiptare nga bulëzimet profesionale të saj deri në ditët tona. Përmes informacioneve, analizave, referencave të studiuesve të shquar të lëndës, arritjeve dhe vlerësimeve mbi muzikën artistike shqiptare të periudhave të para Luftës së Dytë Botërore, të periudhës së socializmit dhe të dekadave të fundit të demokracisë, libri është një trajtim krejtësisht i rinovuar i dijeve tona historike muzikore.
Në këtë botim paraqiten në mënyrë shteruese studimet më esenciale dhe shkencore të muzikologjisë sonë aktuale, përgjatë periudhave të zhvillimeve muzikore në Rilindje, në periudhën e Pavarësisë dhe të Mbretit Zog, të periudhave të epokës socialiste si dhe të zhvillimeve të fundit të dekadave të demokracisë.
Përmes përjetimeve personale, dokumentacionit të pasur dhe shumë analizave të hollësishme muzikore, në këtë libër botohen për herë të parë informacione, konstatime, ngjarje, arritje, portrete dhe vlerësime mbi muzikën e pas viteve ’90. Libri është pajisur nga autori me portretet më të shquara të kompozitorëve tanë, si dhe me disa rubrika shtesë mbi muzikologjinë tonë, etnomuzikologjinë apo historinë e institucioneve kryesore në vend. Gjithashtu përmes një bibliografie të gjerë përmendet edhe një listë e gjatë e veprave të shqyrtuara. Ky material është ballafaquar dhe kolauduar paraprakisht me trupën akademike të Fakultetit të Arteve, përmes botimit online në faqen e Universitetit, duke pasuruar e mprehur edhe më tej konkluzionet, faktet dhe analizat përbërëse të tij.
Boshllëku prej 40 vitesh e një historie të plotë të muzikës shqiptare, duket se ka angazhuar profesorin Nestor Kraja të shkruajë një studim shkencor në këtë drejtim. “Kjo mungesë kishte filluar të rëndohej në mendjen tonë.
Ka pasur trajtime politike të shumta, ujëra të cilat duhet të hiqeshin. Gjërat duhet të trajtoheshin direkt ashtu siç ishin në të vërtetë, pa asnjë lloj trajtimi politik”, ka thënë ai për mediat.
Kryesisht një histori e cila i vjen në ndihmë vetë studentëve për të njohur të shkuarën, e për të ndërtuar një muzikë më të mirë në të ardhmen. “Brezat e rinj të instrumentistëve duhet të jenë të ndërgjegjshëm se çfarë vlere ka pasur historia e muzikës shqiptare, dhe të mundohen ta shtyjnë atë më përpara”, tha profesori.
