Spektakli i famshëm “Wie is de Mol” në Holandë, ka zgjedhur Shqipërinë si sheshxhirim. Ministrja e Kulturës, Elva Margariti shprehej mjaft e entuziasmuar, pasi zgjedhja e Shqipërisë si sheshxhirim nga “Wie is de Mol?” shërben në formën e një promovimi të mirëfilltë për vendin tonë.
“Kur mësuam se producentët e spektaklit të famshëm “Wie is de Mol?” ne Hollandë kishin zgjedhur Shqipërinë si sheshxhirimi, padyshim menduam që ky ishte promovimi perfekt për vendin tonë, te një vend tjetër që me shumë gjasë dinte pak ose aspak për të. Shifrat rekord të audiencës, në vetëm 4 episodet e para tregojnë se Shqipëra ka ngjallur një kuriozitet të jashtëzakonshëm te publiku, çka dëshmon për dëshirën për të ditur e njohur më shumë, por edhe zgjedhjen e zgjuar e të suksesshme të producentëve. Me siguri rezultatet do t’i shohim gjatë sezonit turistik”, shkruan Margariti në Facebook.
Shqipëria është përzgjedhur si destinacioni për xhirimet e 12 serive të sezonit 22 për vitin 2022, të spektaklit më të ndjekur televiziv në Holandë, “Wie is de Mol?”. Në spektaklin me mbi 4 milionë shikues, 11 konkurrentë, personazhe VIP holandezë erdhën në Shqipëri dhe xhiruan lojërat me sfida dhe aventura, në vendet më të bukura dhe mbreslënëse të Shqipërisë. 11 yjet holandeze që xhiruan serialin në Shqipëri, janë artistë të njohur; prezantues televizivë, aktorë, krijues, gazetarë, shkrimtarë, këngëtarë. Ata zbulojnë në çdo seri, me aventurat e tyre rrëqethëse, destinacione spektakolare të Shqipërisë për dymbëdhjetë javë rresht.
