Kuba u përgatit të evakuojë popullatën përgjatë rajonit jugor të ishullit mes frikës se stuhia tropikale Elsa mund të shkaktojë përmbytje të mëdha pasi goditi disa ishuj të Karaibeve, duke vrarë të paktën tre persona.
Qeveria hapi strehimore dhe ndërhyri për të mbrojtur të mbjellat e kallamit të sheqerit dhe kakaos përpara stuhisë, objektivi i ardhshëm i së cilës ishte Florida, ku Guvernatori Ron DeSantis shpalli gjendjen e jashtëzakonshme në 15 qarqe, duke përfshirë Qarkun Miami-Dade ku ndodhet ndërtesa që u shemb javën e kaluar.
Elsa ndodhet afërsisht 175 milje (280 kilometra) në lindje-juglindje të Gjirit të Montego, Xhamajka dhe po përshpejton nga perëndimi në veriperëndim me 28 km/ orë. Ajo kishte erëra maksimale të qëndrueshme prej 100 km/ orë, sipas Qendrës Kombëtare të Uraganeve në Miami.
Stuhia vrau një person në Shën Lucia, sipas Agjencisë së Menaxhimit të Emergjencave të Karaibeve. Ndërkohë, një djalë 15 vjeç dhe një grua 75 vjeç vdiqën të shtunën në Republikën Dominikane pasi muret u shembën mbi to, sipas një deklarate nga Qendra e Operacioneve Emergjente./AP
