Ish-lojtari i përfaqësueses franceze, Adil Rami ka bërë një deklaratë të çuditshme në lidhje me eleminimin e Francës nga kampionati evropian ”Euro 2020”.
Sipas tij, ishte diçka e mirë që Mbape humbi penalltinë e tij duke kualifikuar Zvicrën, pasi do të duhet të mësohet me të tilla situata dhe eksperienca në të ardhmen, shkruan Newsin 24.
“Kam lexuar se ndoshta nuk është keq për Mbappe që humbi atë penallti. Duhet të kalojë këto eksperienca, të bjerë, të dështojë, të kritikohet, të piqet dhe të kuptojë se çfarë është futbolli. Unë jam i kënaqur ta shoh se si vuan, pasi e di që falë kësaj do t’ia dalë të fitojë Topin e Artë”, tha Rami.
Ish mbrojtësi i Milanit, i cili aktualisht luan për Boavistën, foli edhe për karakterin shpesh të diskutuar të Mbappe.
“Sa për karakterin nuk më habit, pasi e kam parë edhe unë në 2018-ën. Do që të jetë më i miri dhe të bëjë si idhulli i tij, Cristiano Ronaldo, por nuk duhet të harrojmë që është akoma një djalosh 22-vjeçar dhe mund të përmirësohet. Zgjedhjet e tij nuk janë perfekte, por do të rritet”, tha mbrojtësi francez.
Franca u eleminua në fazën e 1/8-ave të ”Euro 2020” nga Zvicra. Ndeshja përfundoi në barazim 3-3, dhe nga pika e bardhë e penalltive, i vetmi që gaboi ishte Mbape, duke dërguar ”gjelat” në shtëpi.
