Në mëngjesin e 5 qershorit, 23-vjeçarja Farida Garba (pseudonim) hapi aplikacionin e saj Twitter për të zbuluar se, si dhe 39 milion përdorues të tjerë nigerian të Twitter-it, as ajo nuk ishte në gjendje të hynte në platformë.
“Tweet-et ndaluan së ngarkuari dhe më duhej një orë për të kuptuar se çfarë ndodhi,” tha Garba , e cila zgjodhi ta përdorë këtë pseudonim për sigurinë e saj, teksa foli për ‘BuzzFeed News’.
Vetëm një ditë më parë, qeveria nigeriane kishte njoftuar se do të ndërpresë përdorimin e Twitter-it në vend, për ironi të fatit përmes llogarisë në Twitter të Ministrisë Federale të Informacionit dhe Kulturës. Në ditën kur ndalimi hyri në fuqi, Shoqata e Operatorëve të Autorizuar të Telekomunikacionit të Nigerisë, e cila përfaqëson të gjitha kompanitë e telekomunikacionit dhe ofruesit e shërbimeve në vend, konfirmoi që anëtarët e saj kishin marrë urdhra nga qeveria federale për të pezulluar hyrjen e të gjithë përdoruesve të rrjetit në Twitter.
Qeveria e quajti ndalimin “të përkohshëm” por nuk specifikoi sa kohë do të mbetej në fuqi. As Presidenti nigerian Muhammadu Buhari, i cili, kur u pyet për të ardhmen e ndalimit në një intervistë të rrallë, tha se do ta mbante për vete këtë përgjigje.
Për shumë njerëz, njoftimi për ndalimin duket se ishte në përgjigje të vendimit të Twitter-it për të fshirë një postim të bërë nga Buhari, duke e cituar atë si shkelje të rregullave të “sjelljes abuzive” të aplikacionit. Llogaria e tij u pezullua gjithashtu për 12 orë./TIRANA TODAY
