Partia Alternativa për Gjermaninë (AFD), do e ketë pjesë të axhendës elektorale nxjerrjen e vendit nga Bashkimi Europian.
400 nga 600 delegatët e partisë gjermane të ekstremit të djathtë votuan tezat me të cilat do të konkurrojnë në zgjedhjet e shtatorit.
“E konsiderojmë të nevojshme daljen e Gjermanisë nga Bashkimi Europian dhe themelimin e një grupi të ri interesi europian dhe ekonomik,” deklaruan delegatët e AFD-së.
AFD gjithashtu ka kërkuar të apelojë te kritikët e politikës gjermane të koronavirusit dhe te mijëra njerëz që kanë protestuar ndaj masave të bllokimit gjatë vitit të fundit, shkruan Euronews.
Pavarësisht se e ka emërtuar veten si partia “anti-bllokim”, ajo nuk ka arritur të përfitojë nga vështirësitë ekonomike dhe sociale që rezultojnë nga pandemia, ose nga lëvizja kundër kufizimeve të pandemisë.
Partia ka parë një rënie të konsiderueshme në mbështetjen e saj. Ajo ka rënë në rreth 11 përqind në sondazhe nga gati 13 përqind në zgjedhjet e 2017 kur u bë opozita zyrtare parlamentare.
Sondazhet paraprake e renditin CDU-CSU-në e Merkelit me rreth 27 për qind të votave, të dytët vijnë të Gjelbrit, ndjekur nga socialdemokratët.
