Kancelarja gjermane, Angela Merkel ka paralajmëruar se variantet e reja të koronavirusit mund të bëhen dominues dhe të shkaktojnë një valë të tretë.
Gjatë fjalës së saj në Bundestag, Merkel u shpreh se në ditët në vazhdim situata nuk pritet të jetë pozitive, teksa komentoi pandeminë dhe masat e marra nga qeveria gjermane.
“Në disa vende europiane kemi parë një rritje të herë pas hershme dramatike të infeksionit dhe kjo mund të ketë efekte katastrofike për sistemet shëndetësore. Jo gjithçka është studiuar me thellësi, por do të bënim mirë të mos dyshonim tek ekspertët në vend dhe jashtë tij, kur ata na shpjegojnë se të tre variantet janë më agresivë dhe më të transmetueshëm”, tha Merkel.
Në mbledhjen e sotme mes kancelares dhe kryeministrave të landeve, u vendos që lockdown të vazhdojë deri më 7 mars. Përjashtim do të ketë për floktoret, që mund të rihapen nga 1 marsi nën masa të rrepta për ruajtjen e higjenës
Hapja e shkollave dhe kopshteve të fëmijëve nuk do të rregullohet në nivel federal, por në bazë të kompetencave të landeve.
Më tej, kancelarja kërkoi që të bëhet ende durim në luftën ndaj pandemisë. Megjithatë, Merkel theksoi se numri i viktimave në Gjermani po zvogëlohet, por ajo tha se mund të ketë zhvillime të pakëndshme në vijim për shkak të varianteve të reja të virusit.
