Ashtu sikurse dihej që nuk ka asnjë përjashtim dhe të gjithë goditen, COVID-19 nuk kurseu as klubet e futbollit. Një nga ato që e pësoi më keq ishin spanjollët e Valencia, të cilët dyshohen të jenë infektuar në momentin kur udhëtuan drejt Italisë për ndeshjen e Champions League ndaj Atalantës.
Megjithatë, asgjë nuk është e sigurt dhe virusi në skuadër mund të ishte infiltruar edhe kohë më parë. Gjithsesi, pas testimeve të para, 10 lojtarë të ekipit të parë rezultuan pozitivë duke detyruar të gjithë pjesëtarët e skuadrës të futeshin në karantinë.
Por, tashmë situata duket sikur është qetësuar pasi janë kryer teste të tjera dhe futbollistët kanë rezultuar negativ, duke fituar betejën, edhe pse për t’u siguruar do ketë të tjera testime. Megjithatë, ata që mund të thuhen me plot gojën se e kanë fituar betejën janë disa prej titullarëve të cilët për dy testime radhazi kanë rezultuar negativ.
