Aktivistja 16-vjeçare Greta Thunberg është vlerësuar si personi i vitit 2019. Ajo ka frymëzuar shumë persona me fjalimet e saj për ndryshimet klimatike. Po sukseset e saj duket se nuk kanë të ndalur, pasi një dokumentar i është dedikuar asaj.
Aktivistët më të vjetër e kanë mirëpritur, duke e lejuar që të japë fjalimet e saj për të sfiduar liderët botërorë, që të punojnë më shumë për të ndaluar ngrohjen globale. Siç duket, udhëtimi i Greta Thunberg nga një “adoleshente e urtë” në një nga figurat kryesore të lëvizjes për klimën, do të tregohet me detaje në një dokumentar.
Sipas “Deadline”, suedezja është ndjekur që në protestën e parë në shkollë, gushtin e kaluar në Stokholm, duke vazhduar më pas se si u bë aktiviste e famshme. Cecilia Nessen dhe Frederik Heinig janë producentët e projektit, ndërsa regjia i është besuar gazetarit suedez Nathan Grossman. Dokumentari me titull “Greta” do të shfaqet në verën e vitit 2020.
