Agjencia e Lajmeve Zhurnal bën me dije se edhe nëse kryeministri i Maqedonisë së Veriut, Zoran Zaev, vendos të japë dorëheqjen, kjo nuk do të thotë që do të bjerë edhe qeveria.
Sipas kësaj agjencie, kryeministrin Zaev do ta zëvendësojë ministri aktual i Brendshëm, Oliver Spasovski, i cili do ta udhëheqë qeverinë deri në fund të vitit të ardhshëm, kur edhe përfundon mandati.
Zaev pritet ta njoftojë vendimin e tij përmes një konference për shtyp , pasi të kthehet nga Brukseli. Kujtojmë se lajmin për dorëheqjen e Zoran Zaev, e dha agjencia italiane e lajmeve Ansa dhe më pas nisën aludimet.
Nga ana tjetër, sipas mediave vendase, edhe partitë opozitare po kërkojnë dorëheqjen e tij dhe zgjedhje të përkohshme parlamentare. Mësohet se opozita kërkon gjithashtu edhe formimin e qeverisë teknike, konform marrëveshjes së Përzhinës.
