Kryeministri i Kosovës, Ramush Haradinaj, ditë më parë u ka dërguar letër shpjeguese të gjithë kryeministrave të botës, për t`ua shpjeguar kështu edhe natyrën e dialogut Kosovë-Serbi.
Haradinaj ka thënë se dialogu Kosovë-Serbi është dialog mes dy shteteve sovrane dhe për subjekt nuk e ka statusin final të Kosovës, por normalizimin e raporteve Kosovë-Serbi, me njohje reciproke.
“Me atë të këtij sqarimi dhe qëndrimi, synojmë t’i japim fund propagandës serbe”, ka thënë ndër të tjera ai.
Shefi i Grupit Parlamentar të Aleancës për Ardhmërinë e Kosovës, Ahmet Isufi, duke folur rreth kësaj çështje ka thënë për “Bot sot” se këtë veprim Haradinaj e ka bërë për të heqë çdo dilemë se për çfarë dialogu bëhet fjalë duke u bazuar në Kosovën shtet sovran e të pavarur dhe të vërtetuar edhe në Gjykatën Ndërkombëtare të Drejtësisë.
“Meqë kemi pasur më herët një dialog në mes të Kosovës e Serbisë e që ka rezultuar me dobësim të pozicionit të shtetit tonë për shkak se Serbia edhe me tutje nuk i zbaton marrëveshjet e arrira dhe janë hapur tema rreth kufijve, Kryeministri Haradinaj u ka dërguar letër të gjithë Kryeministrave të botës për ti njoftuar për qëllimin e saktë të dialogut. Ky dialog duhet të ketë temën bazë njohjen reciproke të dy shteteve me një marrëveshje gjithëpërfshirëse që si garantues do të ishin Shtetet e Bashkuara të Amerikës dhe Bashkimi Evropian. Është dashur t`i hiqet çdo dilemë se për çfarë dialogu do të bëhet fjalë. Prandaj edhe dialogu duhet të zhvillohet në mes dy shteteve për normalizim të marrëdhënieve dhe njohje reciproke”, ka thënë Shefi i Grupit Parlamentar të Aleancës për Ardhmërinë e Isufi.
Kryeministri thotë ka përfunduar statusi i Kosovës, ndërsa presidenti thotë nuk ka përfunduar
Por, ndryshe nga Isufi, deputetja e Kuvendit të Kosovës nga radhët e LDK-së, Valentina Bunjaku –Rexhepi, ka pohuar se letra e kryeministrit më shumë tregon pafuqinë e tij në arenën ndërkombëtare karshi fuqisë aktuale të Hashim Thaçit.
“Krahasojeni këtë letër me letrën e presidentit dërguar presidentit amerikan! Nuk ka shtet në botë që kryeministri thotë ka përfunduar statusi i Kosovës, ndërsa presidenti thotë nuk ka përfunduar, madje do të ketë korrigjim kufijsh, duke e bërë të kontestuar edhe vetë territorin. Letra e Haradinajt tregon se sa e do pushtetin, pasi që me këto përplasje me presidentin e kryetarin e Kuvendit, do të duhej ta prishte koalicionin PAN dhe ta çonte PDK-në në opozitë”, ka thënë Bunjaku-Rexhepi.
Krasniqi: Letra veprim i duhur
Politologu Faik Krasniqi, ka thënë se Kosova si mjet të vetmin ndaj agresionit serb përballë shtetit të Kosovës e ka pasur vendosjen e taksës. Ai ka thënë se Bashkësia Ndërkombëtare duhet të ketë mirëkuptim.
“Një gjë nuk jam duke e kuptuar se si gjithë ajo luftë e Serbisë kundër shtetësisë së Kosovës dhe asnjë presion i Bashkësisë Ndërkombëtare ndaj Serbisë për t’u ndalur. Kurse ndaj Kosovës presion i madh për heqjen e taksës. Hapur po tregojnë që janë në mbështetje te Serbisë, andaj e vlerësoj kryeministrin Haradinaj për qëndrimin e tij, për mos heqjen e taksës. Letra e tij dërguar shteteve mike rreth taksës, është veprim shume i duhur dhe është momenti i fundit që BE dhe SHBA-ja të reflektojnë, në mënyrë që të marrin masa ndaj Serbisë, nëse kjo e fundit dëshiron marrëdhënie dhe fqinjësi të mirë me Kosovën”, ka thënë politologu Krasniqi.
Burjani: Dialogu s`ka alternativë
Ndërsa, njohësi i çështjeve juridike e politike Blerim Burjani, ka thënë se ideja e Haradinaj për konferencë të tipit ndërkombëtar për këtë temë është e pa pranueshme.
Sipas tij, me një lloj konferencë ndërkombëtare siç e ka thënë ai, hap dilema e dyshime të papara për shtetin e Kosovës, pra s`ka konferencë por ka dialog biletaral të ngushtë me ndërmjetësim të SHBA-së dhe BE-së.
“Kjo është e tëra, pasi të gjitha tema tjera për konfernca multilaterale janë të dëmshme për pushtetin e Kosovës. Rasti Maqedon – Grek u zgjidh përmes BE-së dhe kështu duhet edhe me rastin Kosovë –Serbi. Pra nuk ka konferencë multilaterale të tipit Rambujë apo Vjenë”, ka thënë njohësi i çështjeve juridike dhe politike Blerim Burjani.
Haziri: Ideja për korrigjim kufijsh e dëmshme për diplomacinë
Opinionisti Nexhat Haziri, ka thënë se letra e kryeministrit Haradinaj dërguar shteteve të botës , ku ia sqaron formatin e bisedimeve që janë duke u zhvilluar në mes Kosovës dhe Serbisë si dy shtet të pavarura dhe që asgjë nuk kanë të bëjnë me çështjen e statusit të Kosovës, është pozitive dhe se e njëjta fuqishëm demanton përpjekjet e Beogradit zyrtar që dialogun me Kosovën të ndërmjetësuar nga BE-ja, gjoja se ka për qëllim trajtimin e statusit të Kosovës.
Ai ka thënë se gjithsesi kjo nuk është e mjaftueshme, pasi diplomacia e Kosovës është shumë neglizhente në këtë drejtim, sidomos të disa shtete që na kanë njohur dhe që së fundi kanë një qëndrim të luhatshëm.
“Tek disa Serbia ka arritur të ndikoj, duke bërë që këto shtete ta tërheqin edhe njohjen e shtetit të Kosovës. Po ashtu, duhet potencuar se dëm të madh Kosovës ia ka shkaktuar, sidomos në raport me subjektivitetin e saj ndërkombëtar, edhe idetë e presidentit Thaçi për korrigjim kufijsh si një marrëveshje përfundimtare me Serbinë, e që nënkuptohet hapje e statusit të Kosovës. Andaj letra e kryeministrit Haradinaj është një hap pozitiv që duhet përcjellë edhe me një aktivitet të fort diplomatik nga ministria e punëve të jashtme”, ka thënë opinionisti Haziri.
