Çudirat në futbollin shqiptar nuk kanë fund. Këtë radhë, është Liria e Prizrenit ajo e cila ka bërë një nga transferimet më të bujshme të merkatos së janarit në Kosovë dhe bëhet fjalë për uruguaianin Martins Aristegui Maickol Pio i cili erdhi pak ditë më parë te klubi nga Prizreni.
Por, mesa duket ai nuk është realisht një futbollist i madh siç është prezantuar në fillim nga drejtori sportiv, Vincenzo Alberto Anese, pasi ‘Gazeta Express’ raporton se uruguaiani është këngëtar më shumë sesa futbollist.
Mjafton një kërkim në ‘YouTube’ për të parë talentin e vërtetë të futbollistit me pasion këngën. Ai ka marrë pjesë në disa konkurse kënge në vendin e tij, e madje ka publikuar edhe disa videoklipe. E sigurt është që futbollistët nuk kanë më nevojë të harxhojnë baterinë e telefonit për muzikë, duke qenë se këngëtarin do ta kenë me vete në çdo takim.
