Ish-sulmuesi i ekipeve më të rëndësishme në Itali, i Milanit, Juventusit dhe Romës, në fillimin e sezonit nisi një karrierë të re në Ibiza, ku pritej të bënte diferencën. Bëhet fjalë për Marco Borriello, italianin i cili ka një karrierë të pasur.
Kur firmosi në fillim të këtij sezoni, te Union Deportivo Ibiza, kategoria e tretë spanjolle, të gjithë menduan se kishin marrë një bomber të vërtetë dhe që do të udhëhiqte skuadrën drejt ngjitjes një kategori më lart.
U gabuan shumë. Sulmuesi italian jo vetëm që në 5 muaj nuk e gjeti asnjëherë rrugën e rrjetës, por më së shumti bëri plazh, shijoi bregdetin dhe motin e mrekullueshëm të gadishullit iberik. Ndërsa tashmë ka prishur kontratën përpara kohe. Në kontratë parashikohej që do të fitonte 50 mijë euro për çdo gol, por ato para nuk erdhën kurrë.
Vetë ish-sulmuesi i Milanit dhe Italisë, në një postim sqaroi se tashmë aventura e tij te Ibiza do të vazhdojë përkrah presidentit të klubit, por jo më në fushë, duke paralajmëruar kështu një tërheqje nga futbolli.
