Një rrjet trafiku ndërkombëtar droge është goditur nga autoritetet ligjzbatuese italiane, në një operacion të koduar “Obsesioni”.
Kokaina importohej në Itali nga Amerika e Jugut, ndërsa hashashi nga Maroku dhe marijuana nga Shqipëria.
Ndër personat e arrestuar është edhe shqiptarja Elisabeta Kotja, 40-vjeçe, e cila së bashku me dy femra të tjera është cilësuar si “ndërmjetësuese e rangut të lartë me eksponentët e karteleve të Amerikës Jugore” për trafikun e kokainës.
Mediat italiane shkruajnë se shqiptarja është e fejuara e Salvatore Costantino, një figurë kryesore në këtë trafik ndërkombëtar droge. Sipas hetimeve, pesë grupe kanë bashkëpunuar mes tyre në trafikun e drogës, ku një nga këto është grupi italian i udhëhequr nga vëllezërit Costantino, mes tyre edhe Salvatore, i dashuri i Elisabetës.
Në total, policia italiane ka arrestuar 25 persona me akuzën e trafikut ndërkombëtar të drogës për llogari të klanit mafioz të Ndranghetas Mancusi di Limbadi.
Operacion antimafia i koduar “Obsesioni” është shtrirë në rajonet e Kalabrisë, Lombardisë e Puglias duke zbardhur një trafik të madh lëndësh narkotike nga Kolumbia, Venezuela, Republika Dominikane e Holanda drejt Italisë dhe Evropës.
Në raportin e Antimafias italiane thuhet se shqiptarja Elisabeta Kotja lindur në Shqipëri më 19.09.1979 konsiderohet si një ndërmjetëse e nivelit të lartë me eksponentët e kartelave të drogës në Amerikën Latine. Mes të arrestuarve janë dhe dy femra venezuelase të njohura në panoramën e trafikut ndërkombëtar të drogës; Garcia Rebolledo Clara Ines e Forgione Gina.
Një nga të arrestuarit është dhe kolumbiani Murillo Figueroa Julio Andres, një trafikant mjaft i njohur droge që në të shkuarën ka bashkëpunuar me superbosin e kokainës Pablo Escobar, kreu i kartelit Medellin në Kolumbi, raporton Panorama.
Hetimet prej dy vitesh të antimafias italiane kanë zbardhur një sipërmarrje të vërtetë krimi në trafikun e drogës në nivel ndërkombëtar.
Janë sekuestruar mbi 3000 kg hashash që ka mundur t’i sjell klanve të Ndranghetas një përfitim prej 4-5 milionë euro që më pas investoheshin në trafikun e kokainës.
Për mbrojtjen e aktivitetit të tyre të drogës, përdornin dhe armët dokumentuar nga hetimet e antimafias të cilat kanë zbardhur rolin e italianit Cuçia Carlo, nga Kalabria, një aktor i dorës së dytë në serinë televizive Gomorra, me detyrën e gjetjes së armëve që viheshin në dispozicion të anëtarëve të këtij organizimi kriminal.
Bashkëpunimi në nivel ndërkombëtar me grupe trafikantësh nga Amerika e Jugut, Hollanda, Afrika e Veriut e Spanja, ka bërë që mafia kalabreze të shtrirë territorin e influencës së saj në trafikun e lëndëve narkotike në të gjithë Evropën duke rritur biznesin e fitimeve të cilat i investonte në sektorë të ndryshëm të ekonomisë.
