(AP) Vincent Vetromile, Brian Colaneri, Andre Crysel dhe një 16-vjeçar u arrestuan gjatë ditës së djeshme (22 janar 2019) të akuzuar për planifikimin e një sulmi me bomba. Për tre të rriturit dhe një nxënës të shkollës së mesme u provua se po planifikonin të sulmonin me eksploziv një komunitet mysliman të Nju Jorkut, të quajtur “Islamberg”, thanë autoritetet policore.
Sipas dokumenteve të gjykatës, banorët e një province pranw Rochester-it janë akuzuar se kanë komplotuar për të sulmuar enklavën e vogël myslimane në perëndim të Catskills.
Koha e sulmit ishte e panjohur. Në kohën e ndalimit të tyre në fundjavë, burrat, tre prej të cilëve ishin të veshur si bojskaut “Boy Scouts”, posedonin gjithsej 23 pushkë dhe shotganë si dhe tre eksplozivë të bërë në shtëpi, tha shefi i policisë, Patrick Phelan, në një konferencë shtypi.
“Unë nuk e di nëse kanë pasur një datë të caktuar për sulmin, por ata kishin një plan për të realizuar,” tha Phelan, që nuk përjashtoi mundësinë e arrestimeve të tjera.
Të akuzuarit për posedim armësh dhe komplot ishin 20-vjeçari Brian Colaneri, 18-vjeçari Andre Crysel dhe 19-vjeçari Vincent Vetromile – që të gjithë banorë të province me emrin Greqia, që vendoset pranë Rochester-it. Po aty banonte edhe nxënësi 16 vjeçar i “Odyssey Academy”, që do të përfitojë nga mosha e vogël. Duhet sqaruar se emri “Greqia” i provincës nuk ka lidhje me prejardhjen e banorëve, por vetëm me faktin se themelimi i ngujimit, në vitin 1822, kishte korresponduar me nisjen e revolucionit grek për pavarësi nga Perandoria Osmane.
Ishte vetëm një koment i bërë gjatë drekës së të premtes, nga një nxënës, që nisi hetimin. Ai e kishte lëshuar gojën më tepër se duhet, duke bërë që bashkëmoshatarët e tjerë, të cilët e dëgjuan, të komunikonin me më të rriturit.
“Për pasojë rojet e sigurisë së shkollës dhe policia lokale nisën të intervistonin nxënësit duke shkuar të të dhënat e para për një komplot për të sulmuar një komunitet islamik në Delavare (Delaware), i njohur si Islamberg”, tha Phelan.
Menjëherë më pas policia kontrolloi pesë lokacione dhe gjeti 23 armë si dhe pajisje të shumta elektronike, duke përfshirë telefona dhe kompjutera. Shumica e armëve ishin pushkë dhe shotganë, disa prej të cilave ishin në pronësi të të afërmve të të dyshuarve, thanë autoritetet.
Ndërsa tre bombat e improvizuara u gjetën në shtëpinë e 16-vjeçarit.
“Ishin bomba artizanale – përzierje baroti gozhdësh dhe sendesh të tjera të fshehura brenda një kontejneri”, tha Phelan.
Komuniteti rural në “Delavare County” u themelua nga pasuesit e klerikut pakistanez Sheikh Mubarik Gilani. Shumica e banorëve afro-amerikanë erdhën në këtë zonë nga Nju Jorku në vitet 1980 për ti shpëtuar krimit.
Policia dhe analistët kanë hedhur poshtë akuzat se komuniteti, që shtrihet në 25 hektarë tokë, ka një terren trajnimi të terroristëve, por pretendimet kanë vazhduar për dekada të tëra.
Në vitin 2017, një banor i Tennessee u dënua me akuza federale për atë që autoritetet e quajtën plan për të djegur xhaminë e Islambergut në vitin 2015. Robert Doggart, tani 67 vjeç, vuan dënimin në një burg federal.
Ndërkohë, në lidhje me ngjarjen, një këshilltar i Bashkisë së Nju Jorkut për marrëdhëniet amerikano-islamike, bëri thirrje që për autorët të ngrinin edhe akuza federale, veç akuzave shtetërore.
Shefi i policisë, Patrick Phelan, u shprehu mirënjohje nxënësve që raportuan te më të rriturit dyshimet e tyre. Sipas tij, ata shpëtuan jetë njerëzore. “Po ta kishin kryer këtë komplot, që çdo tregues thotë se ata do ta bënin, mund të kishin vdekur njerëz. Unë nuk e di se sa dhe kush, por viktima do kishim.”
Përktheu dhe përshtati TIRANA TODAY
