Një ditë më parë u shënua vdekja e parë nga fruthi për vitin 2019, pasi humbi jetën një foshnje 4 muajsh. Specialistja e Institutit të Shëndetit Publik, Eugena Tomini, mjaft e alarmuar, tha në një dalje për mediat se në këtë sezon ka rritje të fluksit të vizitave. Moshat më të rrezikuara janë ato nën 2 vjeç, ndaj ajo u kërkon prindërve që të jenë vigjilentë.
“Aktualisht nuk ka raste të rënda fruthi në vendin tonë. Moshat më të rrezikuara janë ato nën 2 vjeç. Komplikacionet nga kjo sëmundje virale janë vdekjeprurëse. Prandaj mos hezitoni të kërkoni ndihmë menjëherë. Transmetimi viral i kësaj sëmundje është mjaft i lartë. Nuk duhet të harrojmë se jemi në sezonin e gripit”, u shpreh ajo.
