Partia Demokratike e ka cilësuar valën e shkarkimeve të njëpasnjeshme nga ministrja Balluku si një strategji të kryeministrit Rama për të mbrojtur projektin e Unazës së Madhe.
Në një deklaratë për shtyp, deputetja Dhurata Çupi tha se “DH Albania” ka lidhje të ngushtë me kryeministrin.
“Fushata e shkarkimeve të drejtorëve hajdutë të Edi Ramës është treguesi i kalbëzimit nga korrupsioni i kësaj qeverie, e cila nuk është e aftë të bëjë reforma, por do të ndërrojë hajdutët e vjetër me hajdutët e rinj. Një qeveri që ka vullnet të luftojë korrupsionin dhe jo të ndajë me klientët e saj paratë e shqiptarëve do ta çonte sot drejt qelisë së burgut drejtorin e Rrugëve, drejtorin e OST-së, drejtorin e Portit dhe çdokënd tjetër që vjedh. Kjo nuk ka për të ndodhur me vullnetin e Edi Ramës, sepse tenderi i Unazës së Madhe, për të cilin po shkarkohen sot drejtorët e tij, u mbrojt nga vetë Edi Rama. Partia Demokratike ka denoncuar që në fillim me fakte se tenderi 40 milionë euro për 2 kilometra është abuziv, korruptiv dhe me fitues të paracaktuar. Partia Demokratike ka denoncuar e para dhe solli prova se DH Albania, ishte kompani e dyshimte me lidhje direkte me Damian Gjiknurin dhe Edi Ramën. Shkarkimi i shërbëtorëve të oligarkëve, të cilët grabisin shqiptarët me firmën e Edi Ramës, është i pamjaftueshëm, është një përpjekje për të larë duart me vjedhjen e 40 milionë euro. Drejtorët e shkarkuar e kanë vendin në burg! Por drejtësia është e paplotë, nëse do të vazhdojë të mos hetojë Damian Gjiknurin, Arben Ahmetajn dhe Edi Ramën për skandalin e vjedhjes tek Unaza e Re”, u shpreh deputetja Dhurata Çupi.
Sot u shkarkua drejtori i ARRSH-së, Afrim Qendro dhe drejtori i Portit të Durrësit, Afrim Bakaj me urdhër të ministres së Infrastrukturës dhe Energjisë, Belinda Balluku.
