Detaje të tjera tronditëse janë përditësuar në lidhje me krimin makabër që ndodhi mëngjesin e sotëm. Majlind Lala ishte divorcuar me vajzën e viktimave, Nevila Mata. Kjo e fundit në momentin kur ka ndodhur ngjarja, nuk ka qenë e pranishme në banesë, pasi ndodhet në Suedi. Thuhet se çifti ka pasur konflikte të hershme me njëri-tjetrin.
Dinamika e ngjarjes:
Sot rreth orës 06:56, në Astir, në rrugën “Kristaq Mone”, dhëndri Majlind Lala ka vrarë vjehrrin dhe vjehrrën, dhe më pas ka qëlluar veten. Viktimat janë Bujar Mata, 63 vjeç, Valentina Mata, 52, dhe dhëndri Majlind Lala.
Pasi ka qëlluar vjehrrin dhe vjehrrën, dhëndri ka dalë nga banesa e tyre dhe ka qëlluar me pas veten.
Kanë qenë fqinjët ata që kanë lajmëruar policinë, pasi kanë dëgjuar të shtënat. Pasi ka mbërritur në vendngjarje, policia ka gjetur viktimat, çiftin e vrarë brenda në shtëpi, ndërsa dhëndri është gjetur poshtë ballkonit të banesës, me pistoletën në dorë dhe i plagosur.
Fillimisht ai është gjetur me shenja jete nga policia, dhe është dërguar në spitalin e Traumës, por nuk ka arritur të mbijetojë.
