Partizani e nis merkaton e janarit me zyrtarizimin e dy mesfushorëve që vijnë nga Renova e Tetovës dhe Flamurtari i Vlorës. I pari është paralajmëruar që në muajin dhjetor, teksa bëhet fjalë për Fatjon Jusufin, i cili është prezantuar dje nga klubi i kuq. Mesfushori që luan më tepër në krahun e majtë, por që mund të përshtatet edhe në rolin e një sulmuesi të dytë, ka firmosur një kontratë 2-vjeçare me të drejtë rinovimi edhe për një sezon.
Prej gjashtë vitesh, lojtari 23-vjeçar ka qenë pjesë e Renovës në Maqedoni, ndërsa do të përfitojë 3 mijë euro në muaj nga kontrata me të kuqtë.
Surpriza e dytë në merkato është një tjetër lojtar me moshë të re, pikërisht Alesio Hyseni, i cili dje mbushi 22 vjeç. Mesfushori vlonjat luan më tepër në qendër të këtij reparti dhe në ditën që prishi kontratën me Flamurtarin, arriti marrëveshjen me Partizanin për 2.5 vite, nga ku do të përfitojë 3 mijë euro në muaj.
RUBEN LIGEON Partizani kërkon një holandez për të forcuar krahun e djathtë të mbrojtjes. Gazeta mëson ekskluzivisht nga burime në klubin e kuq se 26-vjeçari Ruben Evald Ligeon është futur në bisedime me drejtuesit dhe pritet që të arrihet një marrëveshje mes palëve. Ligeon nuk është një anonim, pasi numëron 12 ndeshje me fanellën e Ajaksit të Amsterdamit në vitet 2010-2015./Panorama Sport
