Edhe kryedemokrati Basha, ka komentuar ndryshimet në qeverinë e Edi Ramës. Në vazhdën e akuzave, ai citon se kryeministri Rama qeveris me oligarkët dhe me krimin.
“Edi Rama mund të kishte vendosur shoferin e tij, parukierin e tij, dhe askush nuk do e ndalë. Me aktin e sotëm, Edi Rama dëshmoi se ai nuk ka nevojë për ministra. Ai qeveris direkt me oligarkët dhe me krimin. Me ta ai përcakton se si grabiten pasuritë dhe paratë e shqiptarëve”, tha Basha.
Sa u përket ministrave të larguar, kreu i PD tha se ata janë të korruptuar, dhe duhet të dalin para drejtësisë. Kurse ministrat e rinj, sipas Bashës, janë njerëz pa profil dhe përgjegjësi politike. Për të, ndryshimet në qeveri tregojnë degradimin e plotë të PS.
“Ajo që u ka ofruar shqiptarëve është një përzgjedhje njerëzish anonimë, të paaftë dhe disa të korruptuar thellësisht. Roli i tyre është që të shërbejnë si fasadë në qeverisjen e Edi Ramës me oligarkët”.
“Ndryshimet në qeveri tregojnë degradimin e plotë të PS. Ne pamë një grup njerëzish që vetëm duartrokasin sjelljen e Edi Ramës, që e ka kthyer partinë në një plaçkë.
Ndryshimet tregojnë gjendjen e degraduar mendore të Edi Ramës. Ai nuk fsheh dot të vërtetën që e dinë, dhe e kanë parë të gjithë: Peshku qelbet nga koka”.
