Shumë është diskutuar për pasurinë e kryeministrit Rama, dhe ende një jehonë të madhe ka marë pas protestës së studentëve. Shumë prej tyre, me pankarta në duar, e ngacmonin Ramën sa i takon rrogës që merrte, apo për shtëpinë e tij në Surrel.
Analisti Fatos Lubonja ka rrëfyer disa detaje pikante në emisionin “Të Paekspozuarit”, pasi është diskutuar nëse paratë e shtëpisë së Ramës janë fituar nga emigracioni.
Ai e cilësoi këtë një gënjeshtër të ulët, teksa ndau me qytetarët një episod interesant nga jeta e kryeministrit. Lubonja tha se Rama kishte të ardhura shumë të limituara, dhe për këtë arsye, një anglez i quajtur Bill, i kishte propozuar të bëhej kopshtari i tij, dhe në kohën e lirë të bënte piktura.
“Thash me veten, ore sa pak rëndësi paskemi ne njerëzit që na ka njohur ky, bile edhe nëna e vet, edhe vëllai i vet edhe gratë që ka patur. Po të kishim më shumë rëndësi, nuk gënjen burri në këtë farë feje, se do më vinte zor nga nëna, vëllai, nga filani që i kam marrë borxh.
Në ato vite, ky ka marrë një bursë nga Soros, për të qenë në Paris. Një bursë modeste. Mesa di unë, e ka pranuar Anri Sala, ka fjetur në një dhomë me të, sepse i mbaroi bursa. Ky ishte hall i madh.
Kjo ka qenë situata jonë në atë kohë, se të gjithë kemi qenë të varfër. Ne kishim një mik të përbashkët, Bill, një pasanik nga ata të Soros. Ky në atë situatë, i tha hajde puno kopshtin tim, puno si kopshtar te kopshti im, dhe në kohën e lirë bëj piktura. Unë i thash Bill-it, me këtë mënyrë, do shpëtonte, sepse do ishte bërë edhe piktor.
Këta oligarkët, përse e mbajnë këtë? Sepse ky gënjen dhe bën fasadën. Tani ka humbur edhe aftësinë për të gënjyer.
Nuk ka asgjë të keqe të jesh kopshtar, të jetosh mes luleve. Do ishte më mirë se të jetosh mes hajdutëve”, u shpreh Lubonja.
