Kukësi nuk ka firmosur ende kontratën me Vasil Shkurtajn, edhe pse është arritur marrëveshja me Luftëtarin për shitjen e sulmuesit.
Ky i fundit do të çojë në arkën e gjirokastritëve 70 mijë euro, por duket kërkesat e Shkurtajt janë rritur me zvarritjen e transferimit.
Mësohet se shtatlarti me origjinë nga Vlora që prej dy sezonesh është pjesë e Luftëtarit, nuk ka rënë dakord për disa pika të kontratës dhe ka vënë si kusht ndryshimin e tyre. Shkurtaj merr një pagë prej 6.2 milionë lekësh të vjetër në muaj te Luftëtari, ndërsa Kukësit i ka kërkuar 9 milionë lekësh të vjetër në muaj. Më shumë se paga, duket se palët s’janë në një mendje për disa klauzola, penalitete dhe bonuse, shkruan Panorama.
Te Kukësi janë të bindur se do të firmosë, por asgjë nuk mund të quhet e sigurt.
“Me çmimin që morëm Shkurtajn, ne kishim gati një sulmues nga Qipro. Por duke qenë se nuk është i huaj, zgjodhëm që të merrnim Shkurtajn. Bëhet fjalë për një lojtar që ka bërë shumë gola”, deklaroi pak ditë më parë presidenti Safet Gjici. Por, dje “Panorama Sport” zbuloi ekskluzivisht se bëhet fjalë për sulmuesin shqiptar nga Maqedonia, Berat Sadik, i cili është aktualisht golashënuesi më i mirë i Superligës qipriote.
