Të mërkurën në mbrëmje do të zhvillohen ndeshjet e fundit të Serie A për vitin 2018. Përballja më interesante do të jetë ajo mes Bologna dhe Lazios. Jo për intensitetin që und të prodhojë sfida në fushën e blertë, por për faktin që në pankinat e dy skuadrave respektive do të jenë dy vëllezërit Inzaghi.
Bologna drejtohet nga vëllai i madh i familjes, Pippo Inzaghi, i cili shkëlqeu më shumë në karrierën si futbollist, por që në fushën e trajningut nuk po arrin të njëjtin nivel. Ai rrezikon seriozisht që të shkarkohet nga ‘Emilianët’ nëse nuk arrin të fitojë edhe në këtë sfidë.
Nga ana tjetër, Simone është duke bërë shumë mirë me Lazion dhe nesër do të udhëtojë drejt Bolognas për të marrë fitoren e radhës, që do t’i konsolidonte disi pozitat në zonën Champions, ndonëse pasojat te i vëllai mund të jenë fatale.
Kjo pasi në rast se Lazio do t’ia dalë të fitojë në “Dall’Ara”, atëherë Pippo mund të shkarkohet dhe “pesha e përgjegjësisë” do të bjerë edhe mbi vëllanë e tij, Simonen, ndonëse bëhet fjalë vetëm për një ndeshje futbolli.
“Do të jetë shumë e vështirë, por shpresoj që të fitojë më i miri. Në stadium do të jenë prindërit dhe fëmijët tanë, ndaj besoj se do të dhurojmë një ndeshje të bukur. Këto lloj sfidash fitohen vetëm me paraqitje perfekte, ndaj duhet të bëjmë maksimumin”, tha Philippo Inzaghi pas ndeshjes.
