“O djem rrëmbeni armët, ja vdekje ja liri” ishte thirrja e ish-kryeministrit Sali Berisha, të cilën e bëri vetëm një ditë më parë, në seancën e fundit parlamentare për vitin 2018.
Menjëherë pas këtyre thirrjeve kreu i grupit parlamentar Taulant Balla ka kërkuar që deputeti Sali Berisha të përjashtohet nga seanca, pasi ka bërë thirrje anti-kushtetuese.
Thirrjen e Berishës e kanë komentuar shumë në rrjetet sociale, por më i veçanti ishte shkrimi i pedagogut shqiptar që punon në “Universietin Urbaniana” të Romës.
Profesori i njohur Ardian Ndreca shkruan se thirrja në parlament që shqiptarët të kapin armët i kujton një pasazh të Georges Bernanos kur flet për njeriun me pushkë në dorë i cili s’i përket popullit dhe as traditës.
Më tej pedagogu shpjegon se këto thirrje janë shenjë i kalbjes së indit shoqëror, kalbjeje të pafundme, duke shtuar se njerëzit janë mësuar me erën e keqe, aq sa nuk i bën më përshtypje asgjë.
Studiuesi e mbyll komentin e tij me fjalinë, “të paktën në të kaluarën e kanë pasur zakon që t’i mumifikonin, sot i lanë të lirë me qelb vendin.”
Tue ndie thirrjet në parlament për me kapë armët, m’u kujtue nji pasazh i Georges Bernanos kur flet për njeriun me pushkë në dorë: ai s’i përket popullit, as traditës, nuk ka as shpirt, asht thjesht shenjë i kalbjes së indit shoqnor, i shpërbamjes, i dorëheqjes së arsyes.
E pra kena ende epigonë të kësaj kalbjeje të pafund dhe njerzit janë mësue me erën e keqe sa që nuk i ban ma përshtypje asgja. Të paktën në të kaluemen e kanë pasë zakon me i mumifikue, sot i lanë të lirë me qelb vendin.
