SHBA është gati të organizojë nënshkrimin e një marrëveshjeje Beograd-Prishtinë modeluar sipas marrëveshjes së paqes midis Izraelit dhe Egjiptit në vitin 1978.
Lajmi u deklarua të premten (21 dhjetor) nga Zëvendëskryeministri i parë i Serbisë dhe Ministri i Jashtëm Ivica Daçiç gjatë një interviste për një televizion të Beogradit.
Daçiç shtoi se gjithçka që ka ndodhur kohët e fundit tregon se zgjidhja nuk do të jetë e lehtë.
“Ata ishin të gatshëm për të organizuar takimin në kohën kur ne (Serbia dhe Kosova) do të kemi një marrëveshje, sepse ata nuk janë pjesë e dialogut dhe nuk mund të përcaktojnë kohën, por gjithçka që po ndodh tani me (Kryeministrin Ramush Haradinaj) dhe masat si dhe vendimet e paarsyeshme të Prishtinës thonë se zgjidhja nuk do të jetë e shpejtë,” tha Daçiç.
Sipas tij, letrat e dërguara nga Presidenti i SH.B.A.-së Donald Trump, për presidentët e Serbisë dhe Kosovës, Aleksandar Vuçiç dhe Hashim Thaçi, erdhën si “një lloj mbështetjeje për procesin e paqes”. Ai shtoi se do ishte “vetëvrasje për ata që do e ngadalësojnë atë”.
Traktati i paqes mes Egjiptit dhe Izraelit
Traktati i paqes mes Egjiptit dhe Izraelit u nënshkrua nga presidenti egjiptian Anwar Sadat dhe kryeministri izraelit Menachem Begin, në Shtëpinë e Bardhë në Washington DC në prani të presidentit të Shteteve të Bashkuara, Jimmy Carter. Paqja u nënshkrua 16 muaj pas vizitës së presidentit egjiptian Anwar Sadat në Izrael në vitin 1977 dhe pas negociatave intensive. Karakteristikat kryesore të traktatit ishin njohja e ndërsjellë, ndërprerja e gjendjes së luftës që kishte ekzistuar që nga Lufta Arabo-Izraelite e vitit 1948, normalizimi i marrëdhënieve dhe tërheqja e plotë e Izraelit dhe forcave të armatosura dhe civilëve nga Gadishulli i Sinait, që Izraeli kishte pushtuar gjatë luftës së “Gjashtë Ditëve” në vitin 1967. Egjipti ra dakord të largohej nga zona e çmilitarizuar. Marrëveshja gjithashtu parashihte kalimin e lirë të anijeve izraelite përmes Kanalit të Suezit dhe njohjen e Ngushticës së Tiranit dhe Gjirit të Aqaba si rrugë ujore ndërkombëtare. Marrëveshja e bëri Egjiptin shtetin e parë arab që njohu zyrtarisht Izraelin. TIRANA TODAY
