Një prej personaliteteve më sensacionale në YouTube, James Charles ka çuditur të gjithë me një deklaratë të fundit. Ai i ka kërkuar fansave ta lënë të qetë. Kjo pasi një prej tyre arriti të hynte në shtëpinë e 19-vjeçarit në Los Angeles.
“Ju lutem, boll erdhët te shtëpia ime. Unë nuk do t’iu përqafoj, nuk do të bëj një foto me ju dhe në asnjë mënyrë nuk do të firmos kutinë tuaj të make-up-it”,- ishte ky postimi i blogerit të njohur.
Nëpërmjet disa postimeve në Twitter, ai tha se ishte jashtëzakonisht e pasjellshme që fansat t’i shkojnë në shtëpi dhe i shkelin privatësinë. Charles shtoi se kjo gjë po e bënte të ndjehej shumë i pasigurt në shtëpinë e vetë.
“Jam shumë i nevrikosur. Supozohej të mbaroja filmimin orë më parë, por tani e kam të pamundur të përqendrohem.”
Sipas 19-vjeçarit atij iu desh të priste për një kohë të gjatë, deri sa erdhën oficerët e policisë. Ndërkohë shumë prej fansave të Charles i shprehën mbështetje, shkruan Tirana Today.
James Charles ka fituar një famë shumë të madhe, veçanërisht në rrjete sociale, me anë të pamjeve shumë të veçanta që krijon me make-up.
Dy vite më parë ai ishte ambasadori i parë mashkull, për firmën e njohur të make-up, CoverGirl.
Kjo nuk është diçka e padëgjuar më parë, ku shtëpitë e yjeve të ndryshme të YouTube, bombardohen me fansa adoleshentë. Më parë kanë qenë vëllezërit Logan dhe Jake Paul, të cilët kanë thënë se shtëpia e tyre ishte e rrethuar nga fansa. Edhe pse për shumë prej komentuesve, ky është një çmim që duhet të paguhesh, në momentin kur i hyn botës së famës./ Përshtati nga BBC, TIRANA TODAY
