Ish-kryeministri maqedonas, Nikolla Gruevski duket se është në telashe të mëdha. Kjo pasi tre avokatët e tij, Dimitar Dangov, Sterjo Zikov dhe Boro Tasevski kanë hequr dorë nga përfaqësimi i ish-kryeministrit në gjykatë.
Gjatë seancës së kaluar, avokati Dimitar Dangov tha se do të heqë dorë nga përfaqësimi i Gruevskit. Ky i fundit ndodhet në Hungari, ku ka kërkuar azil politik, ndërsa mbi të rëndojnë një sërë akuzash.
Gruevski i ka cilësuar këto akuza si procese të montuara politike të qeverisë së Zaevit.
“Nuk jam befasuar nga aktgjykimi në lëndën “Tanku”, pasi nga seanca e parë është parë se si e udhëheq lëndën gjykatësja. Një gazetar më ka thënë se që në seancën e parë e ka ditur se do të dënohem, ndërsa edhe unë kam pasur ndjenjë se do të dënohem, pasi kam parë sjelljet e Prokurorisë Speciale. Është e qartë se bëhet fjalë për proces të montuar politik.
Disa ditë më parë Zaev tregoi se unë do të dënohem. Jetojmë në kohë kur gjyqësori është i robëruar, i kontrolluar nga pushteti. Ndërsa një gjë e tillë nuk ka qenë në kohën e OBRM-PDUKM-së. Unë nuk i kam njohur gjykatësit dhe nuk kam biseduar asnjëherë me ta”, është shprehur Gruevski.
