Pas protestës së organizuar ditën e djeshme nga Shoqata Patriotike “Albanian Roots”, dhe nga shqiptarët që jetojnë në Nju Jork, në përgjigje të përkujtimores së grekëve për Kacifasin, ka ardhur edhe reagimi i pritshëm i mediave greke, të cilat nuk kanë nguruar të dënojnë atë që ka ndodhur në Brooklyn.
Përkatësisht kanë qenë mediat ekirikas.com, in.gr dhe tanea.gr, të cilat njëzëri u kanë dhënë jehonë kësaj ngjarjeje duke e konsideruar si një sfidë të shqiptarëve kundër emigrantëve grek në Shtetet e Bashkuara të Amerikës. Madje ata shkruajnë se “Shqiptarët po dëbojnë grekët nga Amerika”.
Ndër të tjera këto media shkruajnë, duke cituar median tonë se: “Shqiptarët në Nju Jork kanë zhvilluar një protestë, në përgjigje të përkujtimores së vrasjes së Kostandin Kacifas në Bularat të Gjirokastrës. Shqiptarët, ashtu sikurse raportohet në median ‘Real News’, kanë ndërprerë ceremoninë e komunitetit grek në SHBA për ‘ekstremistin’ Kacifas, sikurse e cilësojnë ata. Sikurse shihet nga pamjet e publikuara në ‘Real News’, ata janë duke protestuar përpara zyrave të këtij komuniteti në Brooklyn, duke mbajtur në duar pankarta me thirrje të ndryshme si: ‘Çamëria dhe Epiri janë shqiptare’, ‘Grekët kanë vrarë njerëzit tanë’, dhe disa sloganë të tjerë.”
Ata shtojnë më tej duke thënë se, pjesëmarrësit në këtë protestë, të cilët ishin rreth 30-40 persona, kanë pasur vazhdimisht sjellje provokative kundrejt pjesëmarrësve grekë në këtë përkujtimore.
