Interi është rikthyer tek fitorja pas një humbje dramatike që pësoi ndaj Atalantës. Zikaltërit mposhtën bindshëm Frosinonen me rezultatin 3-0 në “San Siro”, por më pozitiv ishte fakti që shkëlqyen dy yjet e rinj, Keita Balde dhe Lautaro Martinez. Skuadra e Spalletti-t dominoi përgjatë 90 minutave dhe meritoi fitoren që i ngjit në vend të dytë me pikë të barabarta me Napolin, por me një ndeshje më shumë.
Inter e nis mirë ndeshjen dhe gjen golin e avantazhit që në minutën e 10-të me Keita Balde. Ish-sulmuesi i Lazio-s merr topin në zonë, driblon kundërshtarin dhe godet bukur duke mposhtur portierin. Ky është goli i parë i Balde me fanellën zikaltër.
Inter vazhdon t kontrollojë ndeshjen, por ka krijuar mundësi të tjera shënimi ndërsa miqtë nuk mundohet t’i shkaktojnë asnjë dëm Inter-it gjatë pjesës së parë. Pas pushimit Inter gjen golin e dytë me zëvendësuesin e Mauro Icardi-t, Lautaro Martinez. Sulmuesi argjentinas godet bukur topin me kokë brenda zonës duke dyfishuar rezultatin.
Ky ishte goli i qetësisë për vendasit, të cilët nuk e ulën ritmin dhe vazhdonin të krijonin mundësi pas mundësie për të shënuar, por që nuk shfrytëzohen siç duhet nga sulmuesit. Në minutën e 81’ erdhi goli i tretë i takimit nga Keita. Politano jep një top të bukur për sulmuesin që futet brenda zonës dhe bën një goditje tipike për të mposhtur portierin. Inter fiton dhe ruan hapin e Juve-s.
