Shkatërrimi i Kombëtares Shqiptare nga Skocia vuri në pikëpyetje fatin e trajnerit të kuqezinjve, Christian Panuccit.
Pati shumë aludime se ky i fundit do të shkarkohej nga Duka, ndërsa dolën edhe emra të mundshëm për zëvendësimin e italianit.
Por, fitorja ndaj Uellsit duket se ka përmbys gjithçka pozitivisht për trajnerin italian. Pas fitores 1-0 ndaj Uellsit, Duka dhe Panucci lanë të kuptohej se italiani do vazhdojë të drejtojë kuqezinjtë.
Pas dyjëzimit mbi fatin e Panuccit, duket se Duka ka vendosur t’i japë Panuccit një tjetër shans, për të vijuar punën në krye të pankinës kuqezi.
“Nuk kam diskutuar asgjë para ndeshjes, veçse jam munduar ta mbështes si trajner të ekipit për të marrë rezultat pozitiv. Rezultati nuk ngre ndonjë gjë të madhe, por i kthen besimin skuadrës. Fitorja ndikon në moralin e djemve. Nëse i kthehet besimi atyre, na kthehet edhe neve. Ky besim nuk mjafton vetëm te çunat. Nuk themi që kjo fitore e bëri këtë skuadër shumë të mirë. Të gjithë duhet t’i japim besim”, tha presidenti i FSHF-së.
Panucci pritet të drejtojë Shqipërinë edhe në eleminatoret e europianit ku objektiv mbetet kualifikimi në këtë kompeticion.
